Edhe pse sezoni turistik është drejt fundit, 150 turistë nga vende të ndryshme të botës kanë zgjedhur të vizitojnë vendin tonë.
Duket se të pashqetësuar nga askush, as nga autoritetet, ata janë mbledhur prej 2 javësh në Porto Novo, duke organizuar festa të shfrenuara me drogë e alkool.
Sipas Shqiptarja. com “Ileghal Techno” quhet eventi i organizuar prej tyre.
150 turistët mbërritën në Shqipëri në fillim të shtatorit dhe fillimisht u ndalën në plazhin e Vilë-Bashtovës, ndërsa destinacion të radhës zgjodhën Porto Novën.
Për festat e organizuar prej tyre një peshkatar ka thënë se ata nuk janë turistë të zakonshëm.
“Këtu kanë ardhur njerëz normal zakonisht, tani së fundmi kanë ardhur këta, e shikojnë argëtimin ndryshe, me disko, me pije të ndryshme. Ishin tre diskoteka”, thotë.
Vetë turistët shprehen se zgjedhin pikërisht vendin tonë për shkak se në “Shqipëri çdo gjë është e mundur”.
“Jam nga Sardenja e Italisë, këtu është bukur, kam dy ditë këtu, më pëlqen. Shqipëria është vend i bukur. Do ja sugjeroj edhe miqve të mi që ta vizitojnë, edhe njerëzit janë shumë të mirë”.
“Jam nga Zvicra, kam 3 javë në Shqipëri. Këtu është super, është shumë bukur. Çdo gjë është perfekte, jemi në mes të askundit, të qetë, por edhe qytetin e kemi shumë afër për të shkuar. Më pëlqen me të vërtetë shumë Shqipëria, do ta vizitoj sërish. Në Shqipëri çdo gjë është e mundur”.
“Unë vij nga Roma, Itali. Më pëlqen me të vërtetë këtu, është shumë këndshëm. Unë udhëtoj shumë, e dua këtë vend. Kam ardhur këtu me miqtë e mi”.
Grupimi “Ileghal Techno” është një festë e paligjshme ku marrin pjesë të rinj nga e gjithë Europa, ku nuk mungojnë dhe shqiptarë, të cilët vizitojnë vende të ndryshme, duke u argëtuar pa limit e duke përdorur masivisht alkool dhe lëndë narkotike.
Ndërkohë, autoritetet shqiptare nuk kanë ndërhyrë për të ndaluar këto festime.
