Prokuroria e Posaçme kundër Krimit të Organizuar dhe Korrupsionit ka dërguar për gjykim dosjen për 23 persona mes tyre efektivë policie dhe zyrtarë të cilët akuzohen se kanë mbjellë 28 parcela kanabis në zonën e Skraparit.
23 të pandehurit akuzohen për veprat penale të “Kultivimi i bimëve narkotike” kryer në formën e posaçme, atë të grupit të strukturuar kriminal, “Grupimi i strukturuar kriminal”.
Mësohet gjithashtu se mes të arrestuarve janë dhe 4 efektiv aktualë të policisë, që kanë dekonspiruar operacionet e policisë për të zbuluar parcelat me kanabis..
Gjatë hetimit janë sekuestruar 176 kg lëndë narkotike e paketuar në gjendje të thatë, e gatshme për t’u trafikuar.
Nga hetimet e kryera, si përgjimet telefonike, vëzhgimet e kryera nga policia gjyqësore rezulton se në territorin e rrethit te Skraparit ishin kultivuar bimë narkotike cannabis sativa në parcela dhe vende të ndryshme, pothuajse në gjithë këtë territor. Pas dokumentimit nga SPAK, 23 të pandehurit janë dërguar për gjykim.
Hetimet për këtë grup kriminal kanë nisur prej qershorit të 2020. Sipas SPAK, janë dokumentuar veprime të paligjshme të disa punonjësve të policisë, Neritan Naska (Shef i Stacionit të Policisë Poliçan), Klement Zeqo, Bardhyl Çela, Astrit Duro me detyrë punonjës policie, të akuzuar për shpërdorim detyre.
