Edhe pse u trumbetua fort nga Kryeministri se ky është viti antikanabis dhe policia e mbështeti duke thënë se sasitë e kapura janë të magazinuara prej vitesh, realiteti tregon tjetër gjë.
Në fshatin Kolsh të Lezhës janë gjetur dhe asgjësuar 468 bimë kanabis sativa si dhe 335 kilogramë të tjera në proces tharje.
Në pranga janë vënë dy punëtorë të hashashit, përkatësisht Bledar Bunaj, 29 vjeç, banues në fshatin Lalm i Ri- Kolsh dhe Agron Lushi, 32 vjeç, banues fshatin Lalm i Ri – Kolsh në Lezhë. Ndërsa në kërkim është shpallur si i dyshuar A.P. 38 vjeç, banues në fshatin Lalm – Kolsh.
Në lidhje me këtë rast, policia tha se ka vënë në pranga edhe kryeplakun Bardhok Perdoda, 45 vjeç që njëherësh është edhe specialisht i Pyjores në këtë zonë. Sipas policisë, Perdoda akuzohet për “Shpërdorim detyre” dhe “Moskallzim krimi “.
Përpos gjetjes së parcelave me drogë, policia njoftoi se gjatë kontrollit në banesën e shtetasit Bledar Bunaj, u sekuestruan 80 fara te bimes cannabis sativa.
Në ngarkim të shtetasit Bledar Bunaj rendojnë akuzat: “Prodhim dhe shitje e lëndëve narkotike” “Kultivim i bimëve narkotike” parashikuar nga nenet 283/2, 284 të Kodit Penal.
Në ngarkim të shtetasve Agron Lushi dhe A.P. veprat penale “Prodhim dhe shitje e lëndëve narkotike””Kultivim i bimëve narkotike” parashikuar nga nenet 283/2 dhe 284 të Kodit Penal.
Hetimet për këtë rast të kultivimit të drogës po i ndjek Prokuroria e Rrethit Gjyqësor Lezhë. /Opinion.al
