Vonesat në shpërndarjen dhe aprovimin e vaksinave të koronavirusit kanë shkaktuar shqetësime në të gjithë Evropën. Deri më tani programet e vaksinimit nuk janë përmbushur në vendet e BE, që mund të nënkuptojë se arritja e imunitetit të tufës (vaksinimi i 70% të popullsisë) do të vonojë.
Kjo vonesë megjithatë, do të vijë me koston e humbjes së jetëve njerëzore dhe dëmtimit edhe më të madh të ekonomisë.
Alarmi vjen nga Ugur Sahin, Drejtuesi i BioNTech, kompania që, në bashkëpunim me Pfizer, zhvilluan vaksinën e parë të koronavirusit të aprovuar nga BE.
Z. Sahin foli për një “hendek” në krijimin e vaksinave. Studiuesi turk në mënyrë specifike deklaroi:
“Për momentin gjërat nuk po duken mirë, duket se ka një boshllëk sepse nuk ka vaksina të tjera të aprovuara dhe ne duhet ta plotësojmë boshllëkun me vaksinat tona”.
Ugur Sahin gjithashtu sulmoi Bashkimin Evropian për porositjen e një sasie relativisht “të vogël” të vaksinës BioNTech / Pfizer.
BE porositi 300 milion doza ndërsa SH.B.A. 600 milion. BE ka shpërndarë porositë e saj tek kompanitë e tjera, vaksinat e të cilave nuk janë miratuar ende në Evropë, shkruan Cnn grek.
Nën presion
Tregues i situatës është artikulli i Financial Times me titullin elokuent: “Udhëheqësit evropianë janë nën presion për të shpejtuar vaksinimin”. Sipas Financial Times, BE ka vonuar vaksinimet.
Në Gjermani ishin kryer 130,000 deri në 31 Dhjetor, ndërsa në Francë vetëm disa mijëra. Në të njëjtën kohë në Kinë kishte 4.5 milion të vaksinuar, në SH.B.A. 2.8 milion, në Britaninë e Madhe 945,000 dhe në Izrael 745,000.
Në fushën e vaksinimeve, Izraeli duket se ka suksesin më të madh. Dje 1/1/2021 Tel Avivi njoftoi se ka vaksinuar 10% të popullsisë së tij, pra më shumë se 1 milion njerëz. Izraeli miratoi vaksinën BioNtech më 20 Dhjetor.
Në Izrael tashmë është aprovuar edhe vaksina e Moderna, e cila gjithashtu është aprovuar nga Britania e Madhe. BE do të miratojë vaksinën Moderna në 6 janar. Izraeli ka porositur gjithashtu 1.5 milion doza të vaksinës ruse Sputnik 5./Opinion.al
