“Për fat të keq, LSI po shihet si delja e zezë nëpër institucionet që me të drejtë i drejton”. Kështu deklaroi Majlind Lazimi, drejtori i Postës Shqiptare, i shkarkuar nga Ministrja Milva Ekonomi.
Sipas tij, dy partitë e tjera PD dhe PS po bëjnë gjueti shtrigash ndaj drejtorëve të LSI-së.
“Është krijuar një amulli e panevojshme në media. Unë sot, deri në këto momente, nuk kam asnjë shkresë zyrtare për motivacionin e lirimit tim, për më tepër urdhri i dalë nga ministrja Ekonomi është i pavlefshëm”, tha ai.
I pyetur për motivacionin e shkarkimit ai tha se “e vetmja gjë që kam është një urdhër me katër pika që më duhet ta them që nga baza ligjore është nul”. Posta Shqiptare është shoqëri “SH.A” dhe si e tillë shkarkimi dhe emërimi i Administratorit të saj vendoset nga Këshilli Mbikëqyrës i Drejtorisë së Përgjithshme të Postës Shqiptare”.
Lazmi thotë se kontaktoi me ministren Ekonomi dhe sipas tij, nuk ka marrë asnjë motivacion për lirimin nga detyra nga ana e saj. Ai thotë se ka kontaktuar edhe me zv.kryeministren Mandija, që i tha se nuk ka asnjë rol në këtë vendim.
“Unë do ta ndjek në rrugë ligjore këtë çështje. Unë do të hap një çështje gjyqësore për këtë urdhër të paligjshëm të ministres Ekonomi”, vijoi ai.
