Sekretari i Përgjithshëm i PS, Damian Gjiknuri, njëherësh dhe drejtues politik për qarkun Elbasan i shoqëruar dhe nga Kryetari i Bashkisë Prrenjas Nuri Belba inspektuan punimet këtë të shtunë në aksin rrugor Qukës-Skënderbe në Përrenjas. Ky aks rrugor po shkon drejt përfundimit.
Gjatë fjalës së tij, Gjiknuri u shpreh se një investim i tillë është treguesi më i qartë i vëmendjes për përmirësimin e infrastrukturës jo vetëm brenda qytetit, por dhe në zonat rurale.
“Ta gëzoni rrugën e cila është drejt përfundimit. Eshtë një rrugë që i vjen në ndihmë komunitetit këtu. Një rrugë e bërë tërësisht nga fondet e Bashkisë dhe një rrugë me cilësi të mirë. Kjo është vlera e punës së kryetarit të Bashkisë njëkohësisht edhe angazhimi që ai ka marrë për të adresuar jo vetëm atë pjesën e qendrës së Prrenjasit, por duke u shtrirë dhe në të gjitha njësitë vendore. Ky është një shembull konkret”, theksoi ai.
Gjiknuri tha se qeveria mbetet e angazhuar me programin e saj për të mbështetur zonat rurale.
“Pavarësisht kushteve të vështira, sepse e dimë që buxheti i qeverisë tashmë është orientuar edhe për përballimin e krizave, në programin e qeverisë do mbetet vëmendja për të gjithë zonat rurale.”, deklaroi Sekretari i Përgjithshëm i PS Damian Gjiknuri.
