Policia italiane ka arrestuar një të ri shqiptar pasi tentoi të udhëtonte me dokumente false për në Britaninë e Madhe. Stiven Rina, 29 vjeç u përpoq të hipte në avionin që fluturonte për në Londër nga aeroporti i Napolit. Për të kaluar kontrollin, Rina përdori dokumente italiane të vjedhura.
Mediat italiane raportojnë se kjo është kthyer në një fenomen pasi shumë shqiptarë tentojnë të udhëtojnë për në vende jashtë zonës Schengen me dokumente të falsifikuara. Kjo pasi qytetarëve shqiptarë nuk u lejohet të udhëtojnë pa vizë për në Britani, ndërsa qytetarët italianë kanë të drejtë ta bëjnë këtë thjeshtë me një kartë identiteti.
Fillimisht shqiptari kishte blerë një biletë për në Stamboll me pasaportën e tij shqiptare dhe më pas kishte blerë një biletë të dytë me një kartë identiteti italiane false për të udhëtuar në Londër. /Panorama
