Është mbledhur sërish ditën e sotme Komisioni Hetimor Parlamentar për shkarkimin e Presidentit, Ilir Meta. Ndërkohë ky Komision është duke përfunduar draftin përfundimtar që më pas do t’i dorëzohet parlamentit për votim.
Deputetja e PS Klotilda Bushka, sekretare e Komisionit tha se janë shqyrtuar të gjitha aktet në dispozicion, përfshi dhe raportet e ekspertëve ligjorë. Ajo gjithashtu kërkoi që të ketë edhe një përmbledhje ekzekutive të raportit.
Më tej, ajo theksoi se ky komision po heton deklarata dhe qëndrime zyrtare të Presidentit të shprehur në intervista në media apo rrjete sociale si dhe veprime të Presidentit që pasqyrohen në shkresa drejtuar institucioneve të ndryshme shtetërore
“Konsiderohet që ne disponojmë të gjithë materialin e nevojshëm për të vijuar me draftimin e një projekt raporti. Kemi shqyrtuar të gjitha aktet që kishim në dispozicion, përfshi dhe raportet e ekspertëve ligjorë dhe gjykojmë që raporti të ketë një strukturë të tillë. Është e udhës që të ketë një përmbledhje ekzekutive të raportit. Raporti mund të jetë shumë voluminoz, dhe jo çdokush mund ta lexojë. Të ketë një përmbledhje ekzekutive të shkurtër të raportit.
Renditja e fakteve që rezulton nga provat që janë administruar gjatë këtij procesi hetimor do jetë pjesë e raportit. Është e nevojshme të kemi një renditje të dispozitave kushtetuese ligjore. Nga aktet që kemi shqyrtuar na rezulton që ky komision heton deklarata dhe qëndrime zyrtare të Presidentit të shprehur në intervista në media apo rrjete sociale si dhe veprime të Presidentit që pasqyrohen në shkresa drejtuar institucioneve të ndryshme shtetërore dhe akte të nxjerra”, deklaroi Bushka./Opinion.al
