Një 30-vjeçar i quajtur Endrit Murrani është vënë në pranga nga policia pasi iu gjetën në makinë 67 doza kokainë dhe një shumë parash që dyshohet se i ka përfituar nga shitja e lëndës narkotike.
Bashkë me të në automjet ishin edhe dy persona të tjerë, E.G dhe E.Gj., të cilët janë proceduar penalisht në gjendje të lirë. Sipas policisë dyshohet se ata kanë patur dijeni që 30-vjeçari kishte doza kokaine në makinë dhe nuk e kanë kallëzuar në organet kompetente.
“Specialistët e Seksionit për Hetimin e Narkotikëve, në vijim të punës së pandërprerë për kontrollin e të gjithë territorit, me qëllim evidentimin dhe kapjen e personave që qarkullojnë me lëndë narkotike, merren me shpërndarjen e tyre apo i mbajnë ato në banesë, kanë goditur një tjetër rast të shpërndarjes së lëndëve narkotike, duke arrestuar në flagrancë shtetasin:
E., 30 vjeç, pasi, në rrugën “Ymer Kurti”, gjatë kontrollit të ushtruar nga Policia në automjetin me të cilin ky shtetas qarkullonte u gjetën 67 doza lëndë narkotike kokainë, një shumë lekësh që dyshohen se janë të përfituara nga aktiviteti kriminal i shpërndarjes së lëndës narkotike dhe 1 aparat celular, të cilat janë sekuestruar në cilësinë e provave materiale bashkë me automjetin.
Në vijim të veprimeve u proceduan penalisht në gjendje të lirë edhe shtetasit E. G. dhe E. Gj., pasagjer në mjetin me drejtues E. M., pasi dyshohen se kishin dijeni për këtë fakt dhe nuk kanë kallëzuar në organet kompetente”, tha policia në njoftimin zyrtar.
Materialet iu dërguan Prokurorisë së Rrethit Gjyqësor Tiranë për veprime të mëtejshme hetimore./Opinion.al
