Gjykata e Krimeve të Rënda ka vendosur të dërgojë për gjykim dosjen ndaj ish-ministrit të Brendshëm, Saimir Tahiri. Në një proces që ka zgjatur plot 8 orë, pas analizimit të dosjes, gjyqtarja vendosi që kjo çështje të kalonte për gjykim. Ndërsa avokati i Saimir Tahirit kishte kërkuar pushimin e çështjes.
Duke folur për mediat jashtë Gjykatës së Krimeve të Rënda, Saimir Tahiri tha se tashmë ka ardhur koha që ai të mos heshtë më, teksa foli për “prova të trafikuara” dhe “proces maskaradë”.
“Tani shkojmë në gjykim. Ky është një shans për mua për të treguar atë që kam thënë gjithmonë. Nuk dua të merrem me llojin e akuzës, kam refuzuar gjithmonë të komentoj drejtësinë, prokurorinë apo gjykatën, nuk do ta bëj as tani në respekt të një sistemi në të cilin kam kontribuar edhe unë. Kërkova që gjykimi të mos jetë një histori zvarritje e pafund, prokuroria ka pretendimet e saj unë kam shumë më shumë për të pretenduar se prokuroria, nuk ka nevojë për zgjatje pafundësisht. Saktësoni që unë vazhdoj dhe do vazhdoj deri në fund të argumentoj atë që kam pretenduar që në fillim, që nuk kam pikën e lidhjes me këtë çështje. Atë që verifikoi gjykata italiane, prokurorët pretendojnë që vendimi i Italisë, mendojnë ndryshe, është çështje e tyre. Drejtësia prandaj është e bukur se nuk bën gjithmonë drejtësi, por në ato pak raste që bën drejtësi, ja vlen”, tha Tahiri, duke theksuar se kjo nuk është drejtësia për të cilën ai ka kontribuar.
“Ky proces i ka kaluar kufijtë e një maskarade”, theksoi më tej Tahiri. Ishte fundi i muajit shkurt, kur Prokuroria për Krime të Rënda i mbylli hetimet dhe çoi dosjen e Tahirit në Gjykatë me akuzën për “Trafikim të lëndëve narkotike” në kuadër të grupit të strukturuar kriminal “Habilaj” dhe “Korrupsionit pasiv të funksionarëve të lartë shtetërorë”./Opinion.al
