Më në fund ka nisur në gjykatë marrja e dëshmisë së biznesmenit Ylvi Beqja i cili është dëshmitari i mbrojtur në çështjen “Shullazi”. Biznesmeni pretendon se është kërcënuar dhe gjobitur nga Shullazi dhe bashkëpunëtorët e tij. Gjykata e Krimeve të Rënda administroi një pjesë të dëshmisë së Ylvi Beqjas.
Pas dy muajsh zvarritje, pesë gjyqtarët vendosen të vazhdojnë procesin e sigurimit të provës në prani të avokatëve të caktuar nga shtetit për të pandehurit.
Seanca u zhvillua me dyer të mbyllura, por media mësoi se Beqja ka treguar për njohjen me Shullazin, duke thënë se ka qenë një avokat që i ka prezantuar. Ai ka rrëfyer për takimin me Shullazin në një lokal në zonën e Rrugës së Kavajës, ku edhe i ka treguar për problemin e pronës së ish-hotel Vollgës në Durrës.
Para gjykatës, Beqja ka treguar se Shullazi kishte marrë përsipër riregjistrimin e pronës në Hipotekë kundrejt shpërblimit prej 20 % të pronës. Marrëveshje që është pranuar nga dy palët. Por, më pas nën kërcënimin e armës Emiljano Shullazi e kishte detyruar të firmoste një kontratë, sipas së cilës i dhuronte edhe 10 % të pronës. Pra në total Shullazi merrte 30 për qind të aksioneve të ish-hotel Vollgës në Durrës. “Këtë kontratë e kam firmosur nën presion”, ka thënë dëshmitari i mbrojtur.
Po kështu ai ka treguar edhe kërcënimin me armë që Shullazi i ka bërë pranë zyrës së noteres në Durrës, ku i ka kërkuar tia dorëzojë paratë e shitjes së një pjese të objektit të ish-hotel Vollgës. Mësohet se Ylvi Beqja ka thënë se kishte paguar para cash tek Shullazi dhe pjesëtarët e bandës së tij, deri në momentin kur kompnia arabe, që biznesmeni e përfaqësonte në Shqipëri i kishte kërkuar të mos lëshonte më para në dorë por çeqe.
Beqja i ka thënë gjykatës se Shullazi i kishte kërkuar që çeqet ti shkruajë në emër të Gilmando Danit dhe personave të tjerë, që më pas rezultuan se ishin nipi i Shullazit dhe shoku i tij.
Deri këtu dëshmia në gjykatë ka shkuar normalisht. Por më pas njëri nga avokatët e caktuar nga shtetit është larguar nga salla me argumentin se nuk i premtonte koha, pasi do ishte në një gyq tjetër. Kështu dëshmia është lënë në mes dhe pritet që seanca të vazhdojë sërish të hënën e javës së ardhshme.
Në sallë, nuk ishin të pranishëm personat e akuzuar, ndërsa Shullazi është në spitalin e burgut pasi ka patur probleme shëndetësore. /ABC
