Më 17 Janar të këtij viti u rrëmbye dhe më pas u vra 49-vjeçari Jan Prenga në Kamëz. Bëhet e ditur se dosja e Prengës po bëhet gati për t’u dorëzuar në SPAK. Aktet pritet të dorëzohen të hënën administrativisht në SPAK.
Për rastin e Jan Prengës u arrestuan Leonard Hajri, Bajram Hajri, Elton Hajri, Festim Bexhdili dhe Olsi Turja. Ata u lanë në burg nga Gjykata e Tiranës.
Këta persona, së bashku me Altin Hajrin, i cili është pronari i një kompleksi në Shijak, dyshohet se janë urdhëruar nga një grup kriminal për të rrëmbyer viktimën në 17 janar të këtij viti në Kamëz.
Gjithashtu Gjykata Penale e Tiranës i ka komunikuar masën e sigurisë “arrest në burg” Ardian Docit, i dyshuar për rrëmbimin dhe vrasjen e Jan Prengës.
Doçi ishte shpallur në kërkim në fillim të shkurtit bashkë me Aldo Majnishtën dhe Artan Doçin, anëtarë të grupit Dukagjini pjesëmarrës në rrëmbim.
Pas rrëmbimit dhe dhunës së ushtruar, Jan Prenga ka gjetur vdekjen rrugës për në një kompleks në Shijak, por trupi i tij nuk është gjetur ende./Opinion.al/
