GJKKO ka shtyrë seancën për dosjen “Partizani”, për të cilën është nën hetim ish-kryeministri Sali Berisha dhe dhëndri i tij Jamarbër Malltezi.
Mësohet se seanca e radhës u caktua për në datën 19 maj.
Ndërkohë avokati, Genc Gjokutaj në një deklaratë për mediat tha se Berisha është gjobitur me 10 mijë lekë të reja.
“Sot ishte seanca ku ne vijmë nga një rrëzim kërkese për përjashtimin e gjyqtares, Flojera Davidhi, një vendim i cuditshëm, ku kërkesa është bërë nga ne avokatët dhe është gjobitur zoti Berisha pa pasuri firmën e tij. Është gjobitur me 10 mijë lekë të reja. Ndërkohë që nuk është ai firmëtari i kërkesës. Kjo është një lajthitje e gjykatës.
Ne sot vazhduam, i dhamë mundësinë kësaj gjykatë që të revokonte vendimin për pavlefshmëri që ne kemi ngritur, për ta sjellë këtë proces në shina, por gjyqtarja e rrëzoi këtë kërkesë. Ne njoftuam gjykatën që do bëjmë kërkesë për pavlefshmërinë e gjithë vendimmarrjes së Irena Gjokës, sepse ne kemi vendimin e gjykatës greke për dënimin e saj.
Edhe këtë kërkesë, pavarësisht se ne kërkuam kohë për ta formalizuar këtë kërkesë, ajo e rrezon. Mbi këtë bazë kemi kërkuar një përjashtim tjetër. Për të marrë vendimin e përjashtimit të gjyqtares Irena 2, ne na u dha koha dhe seanca u caktua në datën 19 maj në orën 11:30”, tha avokati.
