Partia Demokratike, përmes një komunikimi për mediat ka bërë me dije një informacion mbi procedimin penal 339/2016, që sipas kësaj partie lidhet me padinë e Dakos për shpifje ndaj Bashës.
Njoftimi i plotë
Informacion shtesë për procedimin penal 339/2016, që lidhet me padinë e Dakos për shpifje ndaj Bashës.
Kryetari i Bashkisë së Durrësit e paditi për shpifje kreun e opozitës duke pretenduar se deklarata e Bashës se ishte kapur në përgjim me kriminelët për të blerë vota, ishte shpifje.
Në Gjykatën e Tiranës që shqyrtoi padinë e Dakos, Kryetari i opozitës paraqiti si provë se të dhënat e deklaruara prej tij publikisht janë pjesë e një dosje hetimore që po trajtohej nga Prokuroria e Krimeve të Rënda me numër procedimi penal 339/2016. Gjykata e Tiranës rrëzoi padinë e Vangjush Dakos, duke konfirmuar se deklarimet e Lulzim Bashës nuk ishin shpifje.
Më herët, Flamur Noka sqaroi në një intervistë në Ora Neës se arrestimet e 24 orëve të fundit janë pjesë e të njëjtës dosje penale për të cilën Lulzim Basha akuzoi Vangjush Dakon në nëntor 2017 se ishte kapur në përgjim me kriminelët për të blerë vota.
“Procedimi penal për Vangjush Dakon mban numrin 339/2016. Në bazë të kësaj dosje, 339/2016 është bërë arrestimi i personave pasditën e së dielës. Policia, qëllimisht e ka fshehur numrin e procedimit penal, në mënyrë që mediat të mos lidhin këto arrestime me akuzën që Lulzim Basha ka bërë 1 vit më parë për Vangjush Dakon.”- tha Flamur Noka.
Të dhënat e procedimit penal me numër 339 po fshihen për të mbuluar provat dhe përgjimet që ka në dosje mbi lidhjen e Vangjush Dakos me këtë grup kriminal.
