Gjykata e Krimeve të Rënda ka dhënë masën e sigurisë “arrest me burg” për shtetasin Armando Koçerri dhe ka caktuar masën e sigurisë “arrest me burg” për 20 ditë ndaj shtetasit Nezar Seiti, të akuzuar nga organët e prokurorisë si të përfshirë në grupin kriminal të vëllezërve Habilaj.
Armando Koçerri u arrestua në operacionin blic në Vlorë, ku në banesën e tij u gjetën 4.5 tonë kanabis, që dyshohej se do të trafikohej në Itali dhe i përkiste grupit Habilaj. Gjatë këtij operacioni, u arrestua edhe Nesar Seiti, person i konsideruar si bashkëpunëtor i ngushtë i Moisi Habilajt.
Ky i fundit, përmendet në përgjimet e Prokurorisë së Katanias, ku më së shumti siguron mjetet e nevojshme për transport të grupit, gjithashtu ndan paratë dhe studion tregun e zi të kanabisit.
Seiti ka dhjetra përgjime dhe ka qenë mjaft aktiv kryesisht pas vitit 2015, duke hyrë dhe dalë lirisht në shtetin italian.
Ndërsa për Koçerrin, të dhënat janë të pakta, ajo që dihet është se do të hetohet dhe procedohet në Shqipëri, pasi nuk rezulton të ketë gisht në veprimtarinë përtej detit.
Deri më tani, dy të arrestuarit, nuk kanë dhënë asnjë detaj përpara organeve ligjzbatuese në lidhje me aktivitetin kriminal.
Nga ana tjetër, në Vlorë ka nisur bllokimi i të gjitha pasurive të Habilajve dhe bashkëpunëtorëve të tyre. Dy prej tyre, Sabaudin Sulaj dhe Florian Habilaj, janë ende në kërkim nga policia./opinion.al
