Partia Socialiste mbledh grupin parlamentar pasi emri i deputetit të saj, ish-ministrit Tahiri rezultoi në përgjigjet e italianëve. Taulant Balla ka njoftuar mbledhje urgjente dhe mbledhja ka nisur në orën 10:00. Kreu i grupit të PS do të bisedojë me deputetët socialistë pas zhvillimeve të fundit, ku dy trafikantë shqiptarë të arrestuar në Itali përmendin emrin e ish-ministrit Tahiri.
Njëri prej tyre, Moisi Habilaj është kushëriri i Saimir Tahirit, ndaj të cilit Partia Demokratike ka bërë vazhdimisht akuza. Ditën e djeshme, vetë Tahiri doli në konferencë dhe deklaroi se i vetmi gabim që ka bërë është që u ka shitur Audin me targa AA 003 GB kushërinjve të tij Habilaj, pa bërë më parë verifikime.
Ndërsa, Kryeministri Edi Rama reagoi duke thënë se Saimir Tahirin e njeh si njeri me integritet, por ka kërkuar që e vërteta të zbulohet sa më parë.
Opozita nga ana tjetër ka kërkuar me insistim Prokurorisë Shqiptare të hetojë Saimir Tahirin.
