Me kërkesë të prokurorisë dhe policisë së shtetit autoritetet greke kanë dorëzuar kartelen me të kaluarën kriminale të Admir Muratajt, tashmë i shpallur në kërkim. Sipas dosjes greke, Murataj ka përdorur 15 emra të ndryshëm dhe është proceduar për shuma grabitje, për të cilat u arrestua por më pas u arratis nga burgu i Trikallas. Në dosje, jepen të dhëna edhe të njohjes mes Dash Kupës dhe Admir Murataj në burgjet greke.
Admir Murataj, është i dyshuar si njëri nga organizatorët e dy grabitjeve të ndodhura në rrugën Qafë Kashar-Rinas.
Në dosjen e ardhur nga Greqia janë evidentuar 15 emrat e mbiemra të ndryshëm që dyshohet se Murataj. Veç dokumenteve shqiptare dhe greke të falsifikuara, që dyshohet se ka përdorur Murataj, autoritet greke kanë renditur edhe veprat penale për të cilat akuzohet apo edhe është dënuar nga shteti fqinj.
Në kartelë dominojnë akuzat e grabitjes së bankave të kryera në qytetet të ndryshme në Greqi. Veç grabitjeve, në dosje i janë faktuar edhe akuzat e vrasjes, sulmit me eksploziv gjatë arratisjes nga burgu i Trikallase bashkë me 13 shtetas të tjerë shqiptar.
Nga ana tjetër, Prokuroria e Krimeve të Rënda dyshon se Admir Murataj së bashku me Dash Kupën, janë organizatorët e dy grabitjeve të ndodhura në Qafë Kashar – Rinas.
Njohja mes tyre, dyshohet se ka nisur që në burgjet greke, ku ka qenë i dënuar edhe Dash Kupa për akuzat e grabitjes. Por në dosje, prokuroria ngre dyshime se janë këta dy të dyshuar Murataj dhe Kupa, të cilët kanë gjetur personat e tjerë me të cilët kanë kryer grabitjen, armët si dhe mjetet për të lëvizur nga vendi i ngjarjes, si para, gjatë dhe pas grabitjes.
Informacioni për lëvizjet e mjeteve të transportit të parave, mënyrën e organizimit të tyre dhe shumat e parave që mjetet transportonin, burimet thonë se siguroheshin nga Fatjon Xhyliu, Ditjon Memlikaj, Neim Avdulaj dhe Admir Çerpija, personi që ka prezantuar informatorët me grabitësit.
Për dhënien e informacionit, prokuroria thotë se grabitësit i kanë shpërblyer me shuma të mëdha parash të dyshuarit Xhyliu, Memlikaj dhe Çerpija, para të cilat ia shpërndante Neim Avdulaj. /ABC
