Shërbimi Informativ Shtetëror ka dorëzuar në Prokurorinë e Krimeve të Rënda një dosje voluminoze për shtrirjen e kanabisit në vend.
Në raportin e SHISH, krahas dyshimeve për përfshirjen e zyrtarëve të policisë në kultivimin dhe mbrojtjen e parcelave të kanabisit përmenden edhe disa administratorë të njësive vendore, raporton ABC News.
Sipas agjentëve të SHISH, në disa zona të Shqipërisë, në jug dhe veri, disa kryetar të njësive administrative dhe kryepleq të zonave, të identifikuar nga SHISH-i janë të përfshirë në kultivimin e lëndës narkotike.
Disa prej tyre, të zgjedhurit vendorë luajnë rolin e ndërmjetësuesve mes policisë së shtetit dhe kultivuesve, për mos prishjen dhe shkatërrimin e këtyre parcelave të hashashit. Në raport, ngrihen edhe dyshime të përfshirjes në kultivimin, ruajtjen dhe mos cënimin e parcelave me hashash edhe të disa drejtuesve të policisë, shefave të komisariateve e të krimeve dhe inspector të zonave të ndryshme.
Për këtë fakt, mësohet se prokuroria për krime të rënda i ka dorëzuar një kopje të raportit edhe Shërbimit të Çështjeve të Brendshme dhe Ankesave në Ministrinë e Brendshme.
Duke i kërkuar verifikimin e infomacioneve operative dhe ligjërimin e tyre që më pas të referojnë materialet proceduese në prokurori. Por edhe pse kanë kaluar disa ditë, burimet thonë se SHÇBA-ja e ministrisë nuk ka kthyer ndonjë përgjigje.
