Pasi u shty për disa herë radhazi, në 15 mars në orën 10 është caktuar të mbahet seanca në Gjykatën e Apelit me Juridiksion të Përgjithshëm në Tiranë për deputetin Ervin Salianji.
Ai u dënua nga Shkalla e Parë me 1 vit burg për kallëzim të rremë lidhur me çështjen “Babale”, teksa Apeli do të vendosë pas më shumë se 3 vitesh.
Gjyqtarët që pritet të shqyrtojnë çështjen në Apel në ngarkim të tij janë Elona Toro, Genti Shala dhe Iliba Bezati.
Kujtojmë se bashkë me Salianjin në Shkallën e Parë u dënuan edhe personat e tjerë të përfshirë në këtë dosje. Fredi Alizoti, (i njohur si kunati i Babales), është dënuar me 2 vite burg për kallëzim të rremë, Albert Veliu, i njohur ndryshe edhe si “Babalja” u dënua me 3 vite e 5 muaj burg, ndërsa gazetari Jetmir Olldashi është dënuar me 5 muaj burg, që i konvertohet në 100 orë punë në komunitet.
Gjykata nuk ka pranoi asokohe kërkesën e prokurorisë për konvertimin e dënimit në shërbim prove për Salianjin.
Në pranverën e vitit 2018, PD botoi 2 audioregjistrime, përmes së cilave supozonte se vëllai i ministrit të Brendshëm asaj kohe, Fatmir Xhafaj, Agron Xhafaj ishte i përfshirë në trafikimin e lëndëve narkotike. E tërë çështja u emërua “Babalja”, pasi dëshmitari X i Partisë Demokratike, i cili ishte i përfshirë në audioregjistrime, thirrej në to me pseudonimin Babale.
