Kryetari i Bashkisë së Durrësit Vangjush Dako është në shënjestrën e opozitës që prej daljes së përgjimeve ku ai rezulton të ketë komunikuar me grupin “Avdylaj” të Shijakut. Njëri prej personazheve me të cilin Dako fliste më shumë në telefon “Niçja” Altin Avdylaj është sot në burg si i dyshuar për trafik droge. Sakaq, PD rishtazi kërkoi arrestimin e Dakos.
Në një deklaratë për mediat, deputeti Flamur Noka tha se “nga përgjimet e prokurorisë, pjesë e dosjes 339, provohet se Vangjush Dako ka patur komunikim të vazhdueshëm me organizatën që bënte trafik droge nga Amerika Latine në Europë. Ky përgjim është bërë në shkurt të vitit 2017, 4 muaj para zgjedhjeve. Në këtë përgjim është është regjistruar një bisedë tjetër me Altin Avdylajn, Niçen e famshëm të blerjes së votave, që sot është në burg për trafik kokaine.
Përgjimet zyrtare të prokurorisë nxjerrin në pah marrëdhënien e ngushtë të Vangjush Dakos me numrin dy të bandës së Avdylajve dhe gatishmërinë dhe garancinë për t’i mbaruar punë bandës. Në këmbim, bandat kanë blerë vota, kanë kërcënuar zgjedhës për llogari të tepsisë së Edi Ramës. Vangjush Dako duhet të arrestohet pa vonesë. Cdo ditë në liri ai shkatërron prova dhe manipulon dëshmitarët. Mosarrestimi i Dakos është dëshmia më e qartë e kapjes së shtetit nga krimi i organizuar me mbështetje të organizatës kriminale të Rilindjes të drejtuar nga Edi Rama”, tha Noka.
Por duket se kryebashkiaku i majtë i Durrësit i ka marrë me sportivitet akuzat e PD. Ai refuzon të përgjigjet ndërsa ironizon me fjalët: “Sapo vizitova rezervatin e peshkut që nuk hahet në Durrës? (mungon peshku Mul Noku se për shkak të erës së keqe nuk e pranon interneti).”
Postimin në facebook, Dako e shoqëron dhe me një video të animuar. Ajo që çka bie në sy është se askush nga PS nuk po i del në krah Dakos këto ditët e fundit, ndërsa ai përballet me ciklonin e PD dhe detyrohet që tashmë të bëjë edhe animacione për rrjetet sociale. /Opinion.al
