Prokurorët e Krimeve të Rënda, Dritan Prençi dhe Vladimir Mara, kanë vendosur të marrin si të pandehur 12 persona si pjesë të dosjes së famshme 339/1. Mes tyre janë edhe Samuel Ndoka dhe Vilson Ndoka, dy nipërit e ish-deputetit Socialist në qarkun e Lezhës Arben Ndoka. Ky i fundit është vënë nën hetim pasi akuzohet për tjetërsimin e pronave në bregdetin e Lezhës, kryesisht tek “Rana e Hedhun” dhe në lagunën e Kunes. Por në lidhje me këtë çështje Krimet e Rënda ende nuk kanë konkluduar me mbylljen e hetimeve.
Në dosjen 339/1 janë evidentuar 7 grupe kriminale dhe i pari që është dërguar në gjykatë është ‘grupi i Shkodrës’. Në këtë grup janë edhe të pandehur nipërit e ish deputetit Ndoka dhe ish kampioni në sportin e mundjes Elis Guri. Ndërsa të pandehurit e tjerë janë Ramadan Dushaj,Rezart Çaçani, Fatbardh Gostini, Neritan Saraçi, Ardit Haxhagiqi, Gentjan Marku, Oltion Noka, Fation Marku, Samuel Ndoka, Vilson Ndoka, Elis Guri dhe Luan Boça.
Këta persona akuzohen për veprat penale të “Prodhim dhe shitja të narkotikëve në bashkëpunim” në formën e grupit të strukturuar kriminal. Dy kushërinjtë Ndoka akuzohen për tentativë vrasje dhe armëmbajtje pa leje, pasi kanë tentuar të vrasin Fatmir Nikollin në 16 shtator 2014 në Lezhë.
Në këtë çështje po verifikohet edhe Vangjush Dako për shit-blerje votash dhe korrupsion zgjedhor. Në dosjen 339 janë në hetim grupi Avdylaj nga Shijaku për trafik droge, ndërsa në 339/1 po hetohen për krimin zgjedhor. /Opinion.al
