Ambasada Amerikane deklaroi sot se 14 shqiptarë janë shpallur “non grata” dhe në mes tyre ish kryeprokurori Llalla, deputeti Tom Doshi dhe ish-kryebashkiaku i Durrësit, Vangjush Dako.
Partia Demokratike ka reaguar në lidhje me këto fakte nëpërmjet sekretarit të përgjithshëm Gazment Bardhi.
Ai ka akuzuar kryeministrin Rama se bashkëpunon me persona të lidhur me krimin e organizuar dhe se kjo gjë është e faktuar nga SHBA. Bardhi thekson se në këtë mënyrë Rama nuk është në një linjë me partnerin strategjik por ka zgjedhur që të mbajë pranë tij persona të shpallur non-grata.
Për këtë arsye nënvizon Bardhi, kryeministri Rama duhet të japë dorëheqjen
“SHBA ka shpallur botërisht si të korruptuar dhe të lidhur me krimin e organizuar dy prej bashkëpunëtorëve më të ngushtë të Edi Ramës. Në vend që të jetë në një linjë me partnerin tonë strategjik, Edi Rama ka graduar Tom Doshin dhe Vangjush Dakon, si mëkëmbësit e tij në Shkodër e Durrës.
Boll më me propagandë! Është koha e së vërtetës! Partnerët tanë e refuzojnë modelin që mban në këmbë Qeverinë e korruptuar të Edi Ramës: vjedhjen e pronës publike, vjedhjen e qytetarëve dhe vjedhjen e zgjedhjeve.
Tani është koha që shqiptarët të shpallin non grata Edi Ramën!
Mirënjohje Shteteve të Bashkuara të Amerikës për betejën e përbashkët për pastrimin e politikës shqiptare nga krimi dhe korrupsioni. Qeverisja e mirë dhe e ndershme, në shërbim të njerëzve të zakonshëm, është vlerë amerikane dhe evropiane” shkruan Bardhi. /Opinion.al
