Eurodeputetja Doris Pack ka marrë pjesë në tryezën e opozitës për arsimin e lartë, ku i pranishëm ishte kreu i Partisë Demokratike Lulzim Basha. Përballë pedagogëve, Pack tha se mbetet problem politizimi i arsimit në Shqipëri.
“Mund të them se sa kam ndjekur nga afër arsimin e lartë në Shqipëri, pasi kam biseduar dhe takuar shumë studentë, politizimi mbetet problem. Jam e keqardhur që universiteti është politik, i politizuar dhe kjo nuk është aspak gjë e mirë. Kjo prish edhe imazhin e universitetit. Po ashtu, qeveria nuk duhet të ndërhyjë në kërkime shkencore dhe as në pavarësinë e integritetin e një pedagogu”, tha Pack.
Doris Pack, Presidente e Forumit të Gruas të Partive Popullore Europiane, ka shtuar gjithashtu se qeveria nuk duhet të përbuzë njerëzit e shkolluar dhe akademikët, por ta vlerësojë këtë kategori.
Nga ana e tij, Lulzim Basha theksoi rëndësinë që ka rritja e buxhetit të arsimit të lartë, duke prezantuar edhe programin e Partisë Demokratike për Arsimin./Opinion.al
