Pas takimit me Monika Kryemadhin, Lulzim Basha ka zhvilluar një takim me aleatët e tjerë. Në takim me Bashën, mësohet se janë Dashamir Shehi, Fatmir Mediu, Nard Ndoka, Vangjel Dule dhe Agron Duka.
Deri në këtë moment, vetëm Agron Duka i Partisë Agrare Ambientaliste ka deklaruar se mbështet propozimin e Bashës për djegien e mandateve dhe se partia e tij hiqte dorë nga tre mandatet në listat e PD-së.
Siç u paralajmërua, në mbledhjen e grupit parlamentar demokrat u vendos sot se do të dorëzohen mandatet. Vendimi përfundimtar do t’i takojë Këshillit Kombëtar të partisë, ndërsa do të ngrihet edhe një grup pune për çështjet teknike të dorëzimit të mandateve.
Pas mbledhjes me aleatët, ku u ra dakord për djegien e mandateve, kryetari i Partisë Demokratike Lulzim Basha, tha se: “Rama nuk është më kryeministër i shqiptarëve”.
“Vendi është në kolaps, tani duhet zgjidhje. Ky moment bashkimi, është një moment kyç për vendin. Jemi të vendosur ti prijmë betejës së popullit ndaj Ramës” tha Basha.
Vangjel Dule, kreu i PBDNJ-së, tha se: “Misioni nuk mbaron me djegien e mandateve.”
“Misioni është i vështirë, kërkon mbështetjen e të gjithëve. Ti jepet fund qeversijes ilegjitime të Ramës.”, tha Dule
Dashamir Shehi, kreu i LZHK-së tha se “Rama është kapur duke vjedhur zgjedhjet ndaj duhet të reflektojë.” “Kjo punë është e mbyllur, mandatet s’na bëjnë asgjë. Sa kohë të jetë Rama aty do na shihni bashkë.” Tha Shehi
Ndërsa Agron Duka, kreu i Agrarëve tha se: “Jam për zgjedhje institucionale , por do të djegim tre mandatet tona”
