Lulzim Basha ka zhvilluar sot në mëngjes një takim me ish-presidentin Bujar Nishani. Pas takimit, Basha është shprehur shkurtimisht për mediat se nuk ka kthim prapa dhe se nuk do të ketë parlament fasadë.
“Nuk ka lëvizje më pro Europës dhe integrimit në Europë sesa kjo që ka vendosur Partia Demokratike dhe opozita. Nuk ka kthim prapa, nuk është vetëm djegie mandatesh, nuk do ketë më parlament fasadë”, është shprehur Basha.
Kryedemokrati ka folur edhe për qeverinë tranzitore, që sipas tij duhet të ndalojë çdo ndërhyrje politike.
“E para dorëheqje e Edi Ramës dhe hetimi i tij. Qeveria tranzitore detyrë të parë dhe kryesore do të ketë te arrestojë politikanë të kapur në vjedhje votash. Qeveria duhet të mundësojë që mos ketë asnjë ndërhyrje politike, si ajo që bëri Rama për të mbrojtur Vangjush Dakon”, tha Basha.
Takimi i Lulzim Bashës me Bujar Nishanin erdhi një ditë pas vendimit për djegien e mandateve të deputetëve. Aktualisht, Bujar Nishani mban postin e Kryetarit të Këshillit Kombëtar të Partisë Demokratike dhe sipas vendimit të djeshëm të grupit parlamentar, do të jetë ky organ i partisë që do të japë vendimin final në lidhje me dorëzimin e mandateve.
