Policia shqiptare bëri të ditur se kreu procedurat për të larguar nga Shqipëria shtetasin turk Harun Çelik sapo përfundoi një dënim, që mori në Tiranë.
Zëdhënësi i policisë, Gent Mullaj, tha për “Zërin e Amerikës” se “ky shtetas ishte i dënuar dhe dje doli nga burgu. Ai është kapur me dokumente false në dalje në Rinas dhe për këtë u dënua. Në bazë të ligjit për të huaj, janë bërë procedurat ligjore për largim nga Shqipëria”.
Pyetjes së “Zërit të Amerikës” nëse Harun Çelik kishte kërkuar strehim e mbrojtje nga Shqipëria si një veprimtar politik i rrezikuar në atdheun e tij në Turqi zëdhënësi iu përgjigj se “nuk kishte info tjetër”.
Harun Çelik, 42 vjeç, mësohet se ishte një mësues, pjesëtar i lëvizjes Gulen në Turqi, i cili në përpjekje për t’u larguar kërcënimeve nga atdheu i tij, u kap në aeroportin e Rinasit me dokumente false duke udhëtuar drejt Kanadasë. Kjo ngjarje ka sjellë dhe reagimin e ashpër të eurodeputetes Ramona Strugariu.
“Kryeministri i Shqipërisë Edi Rama, Shqipëria ka firmosur Konventën e Këshillit të Europës mbi ekstradimin. Për më shumë, ju thoni se Shqipëria është gati për në BE. Atëherë ju lutem respektoni nenin 19, pika 2 të Kartës Europiane për të Drejtat Themelore dhe mos e ekstradoni #HarunÇelik në Turqi!” shkruan ajo në Twitter.
Ndërkohë në mediat turke janë publikuar pamje ku duket momenti i dërgimit të Harun Çelik në aeroport. Në video shihet momenti kur shokët e tjerë, pjesë e lëvizjes “FETO” i thërrasin Harun Celikut duke i thënë “Harun bej sikur te bie te fikët”, që ai të arrijë të shpëtojnë./ Opinion.al
https://www.youtube.com/watch?v=70vatM96RN0&feature=emb_title
