Joana Qeleshi, është dorëhequr nga detyra si kryetare e Gjykatës së Durrësit. Lajmi është bërë i ditur ditën e sotme, ku Qeleshi ia ka komunikuar togave të zeza të Durrësit dhe administratës së kësaj gjykate duke e argumentuar dorëheqjen me shfrytëzimin e një mundësie që i është dhënë për të vijuar karrierën në sektorin privat.
Joana Qeleshi nuk i ishte nënshtruar ende procesit të vetting-ut, në të cilin po kalojnë të gjithë gjyqtarët dhe prokurorët e Shqipërisë. Mësohet se Kolegji i Lartë Gjyqësor ka pranuar kërkesën e gjyqtares për t’u larguar nga detyra.
Pas dorëheqjes së Qeleshit funksionet e kryetarit po mbulohen nga zëvendëskryetari i Markeljan Koça, kjo situatat do të vijojë deri në një emërim të ri në vend të Qeleshit.
“Pavarësisht pasionit tim për profesionin e gjyqtarit, duke qenë se më është ofruar një mundësi profesionale me preferencën dhe ekspertizën time në fushën e Shoqërive Tregtare, kam vendosur të ndjek një stad të ri në karrierën time, duke iu përkushtuar sektorit privat. Mundësia që më është ofruar në këtë sektor në pozicionin e Drejtores Juridike pranë Spitalit Amerikan, paraqitet si sfidë e re profesionale për mua”,-është shprehur Qeleshi. / Opinion.al
