Tre gjyqtarë dje 1 prokuror kanë vendosur të lënë detyrën dhe të mos i nënshtrohen procesit të vetingut. Më e bujshmia është dorëheqja e gjyqtares së gjykatës së lartë Mirela Fana. Ajo tha se do ti kthehet botës akademike nuk mos vazhduar më të jetë pjesë e sistemit gjyqësor. Dorëheqja e saj mbetet e çuditshme pasi vetëm 4 ditë më parë u zgjodh anëtare e strukturës së re “Këshilli i Emërimeve në Drejtësi”.
Po kështu tek Nishani ka mbërritur dorëheqja e Prokurorit të Krujës, Sulejman Tola, i cili mësohet se nuk ka plotësuar formularin e pasurisë për shkak se është në prag të pensionit. Për të njëjtin motiv, dorëheqjen e ka paraqitur dhe gjyqtarja e Kukësit, Drita Veliaj.
Listën e dorëheqjeve e vazhdon gjyqtari Ilir Çeliku, i cili për shumë vite ka qenë pjesë e Gjykatës së Tiranës, ndërsa dy muaj më parë u dekretua nga Presidenti Nishani si gjyqtar në Gjykatën e Apelit Vlorë. Ai është akuzuar disa herë nga mazhoranca në media si gjyqtar pranë Berishës.
Për tre të parët vendimi është marrë dhe janë kryer të gjitha verifikimet, ndërsa për kërkesën e Ilir Çelikut ende nuk ka përfunduar verifikimi nga institucionet verifikuese. Dorëheqjet e tyre mbërrijnë në një moment që presioni i kohës për të dorëzuar dokumentet e vettingut, u rrit ndjeshëm.
Sot ka qenë edhe afati i fundit për dorëzimin e formularëve në Inspektoriatin e Deklarimit të Pasurisë.
