Drejtuesja e Prokurorisë së Krimeve të Rënda Donika Prela aplikon për të qenë pjesë e SPAK, struktura e posaçme kundër korrupsionit dhe krimit të organizuar. Pas saj, për këtë institucion ka aplikuar edhe prokurorja tjetër Elisabeta Imeraj, drejtuese e Prokurorisë së Tiranës.
Këtë të mërkurë kanë dorëzuar dosjet për SPAK edhe Altin Dumani , Prokuror ne Prokurorinë e Apelit Tiranë, Enkeleda Osmani ( Xhengo), Prokurore në Prokurorinë e Gjykatës së Shkallës së Parë, Durrës, Elida Kackini (Celami), Prokurore Pranë gjykatës së Shkallës së Parë, Tiranë dhe Enkeleda Millonai, Prokurore në Prokurorinë pranë Gjykatës së Shkallës së Parë Elbasan, si dhe Maksim Sota, Prokuror ne Prokurorinë pranë Gjykatës së Shkallës Parë Vlorë.
Në 5 shkurt, Komisioni i Pavarur i Kualifikimit (KPK) konfirmoi në detyrë pas dy seancave gjyqësore kryeprokuroren e Krimeve të Rënda. Të tre komponentët e saj u konsideruan të rregullt nga komisionerët e Vetting-ut, të cilët rrëzuan edhe akuzat ndaj saj, si pjesë e përgjimeve me bandën e Avdylajve.
Në pritje të vendimit nga KPK, prokurorja Prela u vu në shënjestër të Partisë Demokratike për lidhjet me kreun e bandës së Avdylajve. Demokratët nuk e kursyen në reagimin menjëherë pas konfirmimit të saj në detyrë.
Në seancat dëgjimore të zhvilluara në janar ndaj shefes së Prokurorisë së Krimeve të Rënda, komisionerët e Vetting-ut konstatuan probleme me pasurinë dhe shmangien e taksave nga bashkëshorti i Donika Prelës, fakt që la shije të hidhur edhe tek vëzhguesi i ONM-së. G.F/ Opinion.al
