Që Donald Trump mendon se meriton të fitojë Çmimin Nobel për Paqen, ashtu si çdo çmim tjetër në botë, është një fakt i njohur. Por lajmet që vijnë nga Japonia tregojnë se tashmë është duke u përpjekur vërtetë për ta marrë këtë nderim të veçantë. Rregullat e komitetit norvegjez parashikojnë që kandidaturat të vijnë nga një palë e tretë, ku më shumë reputacion kanë krerët e shteteve apo të qeverive. Kështu që Donald Trump po vetëkandidohet, duke i kërkuar aleatit të tij, kryeministrit japonez Shinzo Abe që ta propozojë.
Sipas gazetës japoneze “Asahi”, që i referohet burimeve pranë qeverisë, letra që kryeministri Abe ka dërguar në Norvegji për të kandiduar Donald Trumpin është bërë me kërkesë të Uashingtonit vjeshtën e vitit të kaluar.
Për momentin nuk ka komente zyrtare as nga Shtetet e Bashkuara dhe as nga Japonia, por nëse do të rezultonte e vërtetë do të ishte një skandal për të dyja palët, duke qenë se jo më larg se të premten Trump dhe stafi i tij thanë se nuk dinin gjë për këtë çështje.
“Kam marrë një kopje të letrës së bukur prej pesë faqesh, që Shinzo Abe i ka dërguar organizatorëve të Nobelit”, tha Donald Trump përballë gazetarëve në një konferencë për shtyp ku u fol për çështjen e murit me Meksikën. Ai shpjegoi se Japonia e kishte kandiduar për përpjekjet e bëra për pajtimin me Korenë e Veriut dhe takimin historik në Singapor me Kim Jong-un. “Shumë njerëz e mendojnë kështu. Me shumë mundësi nuk do ta fitoj, por nuk ka rëndësi”, tha Trump.
