Ambasadori i Shteteve të Bashkuara në Tiranë, Donald Lu tha sot se pret që ministri i ri i Brendshëm, Fatmir Xhafaj, “të luftojë në mënyrë aktive krimin e organizuar dhe të veprojë në mënyrë të paanshme teksa vendi përgatitet për zgjedhjet”.
I pyetur nga Zëri i Amerikës, për lëvizjet në qeveri, ambasadori amerikan tha se “nëse zoti Xhafaj punon në mënyrë agresive kundër narkotikëve dhe krimit të organizuar, ai do të ketë mbështetjen tonë të plotë”, ndërsa vuri në dukje bashkëpunimin e mëparshëm më zotin Xhafaj, kryesisht në procesin e Reformës në Drejtësi.
“Ne kemi punuar ngushtë me zotin Xhafaj si kreu i komisionit të ligjeve të kuvendit dhe për reformën në drejtësi”, përfundon deklarata e ambasadorit amerikan.
