Edhe pse në dukje reforma në drejtësi është harruar pasi askush nuk flet publikisht për të, është ambasadori amerikan Donald Lu ai që thyen heshtjen. Përmes një statusi në facebook në faqen zyrtare të ambasadës amerikane në Tiranë u bëhet thirrje gjyqtarëve e prokurorëve të vazhdojnë me aplikimet për të shërbyer në institucionet e reja të drejtësisë.
“Shumë shqiptarë patriotë tashmë kanë aplikuar për tëqenë pjesë e Këshillit të Lartë Gjyqësor dhe Këshillit të Prokurorisë, por nevojiten edhe më shumë ekspertë. Ne inkurajojmë profesionistët e kualifikuar që të aplikojnë për të qenë pjesë e këtyre institucioneve të rëndësishme. Për më shumë informacion vizitoni faqen e parlamentit shqiptar”, thuhet në deklaratën e ambasadës.
Ky njoftim të lë përshtypjen se tashmë ambasadori Lu ka “marrë” përkohësisht edhe detyrat e kryetarit të Kuvendit, duke bërë thirrje publike për të vizituar faqen e parlamentit ku gjenden informacionet për reformën në drejtësi.
Në fakt, Ilir Meta vazhdon të jetë Kryetar i Parlamentit edhe për pak ditë. Më 24 korrik ai do të betohet si President. /Opinion.al
