Kryerja e tre të katërtës së dënimit dhe sjellja e mirë në burg janë dy argumentet kryesore mbi të cilat Gjykata e Apelit Durrës ka bazuar vendimin për lirimin nga qelia të Lulzim Berishës, i cilësuar nga Prokuroria si kreu i “Bandës së Durrësit”.
Berisha shijoi lirinë më 6 dhjetor, pas një vendimi gjyqësor që pranoi kërkesën e tij për lirim nga qelia. Ky vendim i Apelit erdhi në një kohë që Berishës i kishin mbetur edhe gati 5 vite dënim nga totali prej 25 vitesh heqje lirie, caktuar ndaj tij nga Gjykata e Lartë, raporton “Panorama”. Burime pranë kësaj Gjykate sqaruan se në thelb të arsyetimit të vendimit është fakti që kërkuesi Berisha kishte kryer tre të katërtën e dënimit. Njëkohësisht, për gjykatën është vlerësuar edhe fakti se Berisha ka treguar sjellje të mirë gjatë qëndrimit në qelitë e burgut. Referuar vendimit, Berisha do të qëndrojë në liri me kusht për pjesën e mbetur të vuajtjes së dënimit. Gjatë kësaj kohe, ai duhet të mbajë kontakte me Zyrën e Shërbimit të Provës në Durrës. Kërkesa për lirim e të dënuarit Berisha, si një nga anëtarët kryesorë të grupimit kriminal të njohur si “Banda e Durrësit”, ishte paraprirë edhe nga një kërkesë tjetër e kësaj natyre, ku ai pretendonte të dilte nga qelia për arsye shëndetësore. Nga ana tjetër, vendimit pritet t’i bëhet rekurs nga ana e Prokurorisë. Një burim pranë organit të akuzës sqaroi se pas marrjes në dispozicion të vendimit të zbardhur të Apelit të Durrësit, do të përpilohet kundërshtimi i tij.
GJYQTARET
Treshja e gjyqtarëve të Apelit Durrës, që kanë firmosur vendimin për nxjerrjen nga qelia të Lulzim Berishës, është përbërë nga gjyqtari Arben Vrioni, kryesues dhe gjyqtarët Petrit Çeno dhe Anita Mici, anëtarë. Gjyqtari Arben Vrioni është emëruar në Apelin e Durrësit më Më parë ai ka qenë në Gjykatën e Elbasanit, ku ka qenë edhe në pozicionin e kryetarit. Gjyqtarja Anita Mici është promovuar në Apel në prill të këtij viti. Më herët ajo ka ushtruar funksionin e gjyqtares në Shkallën e Parë të këtij rrethi gjyqësor. Emri i gjyqtares Mici është lakuar në nëntor 2013, kur ajo deklaroi të pafajshëm shtetasit Enver Stafuka dhe Gentian Bajtja, të akuzuar për vjedhjen e një mjeti “BMW”, që u përdor në ekzekutimin e kryekomisarit Dritan Lamaj. Stafuka u zhduk dy vite më vonë, pasi u rrëmbye nga persona të paidentifikuar. Ndërsa gjyqtari Petrit Çeno ushtronte prej disa vitesh detyrën e gjyqtarit në Apelin e Durrësit. Emri i tij është i njohur si anëtar i Kolegjit Zgjedhor të Apelit në vitin 2012./ Panorama.al
