Një prej emrave më të lakuar për drejtimin e kombëtares shqiptare është ish-mesfushori i Milanit, Roberto Donadoni. Ai ka një eksperiencë prej 18 vitesh si trajner dhe gëzon respektin jo vetëm si një teknik serioz, por edhe si një profesionist që nga ana njerëzore arrin t’u marrë më të mirën lojtarëve që ka në dispozicion. Por si është e vërteta e kontakteve të Dukës me Donadonin?
“Panorama Sport” bisedoi dje me trajnerin dhe ai mohoi të ketë pasur negociata konkrete, por një fije shprese e ka lënë. “Jam gati, por duhet të më luteni ju mua…”, ishte konteksti i përgjigjeve të tij për gazetën.
“Nuk kam biseduar me asnjë zyrtar të federatës shqiptare. Por nëse do të ketë një iniciativë konkrete, atëherë pa dyshim që do të flasim”, ka thënë Donadoni.
Roberto Donadoni ka drejtuar Italinë në vitet 2006-2008, por edhe ekipe të tjera si Parma, Napoli, Livorno, Cagliari dhe së fundi Bolonja./Opinion.al
