Ipeshkvi i Dioqezës së Rrëshenit, imzot Gjergj Meta ndodhet këtë të mërkurë në Vatikan, ku ka zhvilluar një takim me Atin e Shenjtë, Papa Leonin XIV.
Lajmi është bërë i ditur nga Dioqeza e Rrëshenit, e cila ka shpërndarë videon e takimit.
Bashkangjitur videos, thuhet se gjatë bisedës së shkurtër që patën, imzot Gjergj Meta e ftoi Papën të vizitojë Shqipërinë.
“Sot, më 28 maj 2025, ipeshkvi i Dioqezës sonë të Rrëshenit, imzot Gjergj Meta, përshëndeti Atin e Shenjtë, Papa Leonin XIV, në Udiencën e Përgjithshme të së mërkurës. Imzot Gjergji i tregoi atij se të dielën e kaluar, së bashku me shqiptarët katolikë të Italisë, janë lutur për të në Shenjtëroren e Zojës së Këshillit të Mirë, në Genazzano. Gjithashtu, në emër të ipeshkvijve dhe të Kishës Katolike në Shqipëri, e uroi Atin e Shenjtë për zgjedhjen e tij si Pasardhës i Pjetrit dhe e ftoi atë që të vijë në vendin tonë. Qoftë lëvduar Jezu Krishti!”, thuhet në njoftim.
