Një gazetë ka arritur të fitojë megatenderin e OSHEE-së, i cili ka të bëjë me identifikimin e të gjithë abonentëve. Boldnews.al ka siguruar formularin e njoftimit të fituesit, ku detajohen fituesit. Megjithatë, nga ajo çfarë duket në këtë tender është se e gjitha ka qenë e paracaktuar. Kështu, fitues të këtij prokurimi janë shpallur, jo një, por tre firma. Ato janë bashkuar, dhe për rrjedhojë, kanë ndarë edhe lekët.
Ndërkohë, firma e katërt, ka marrë pjesë në këtë prokurim vetëm formalisht, pasi ka dorëzuar një “çek të bardhë” para anëtarëve të komisionit të vlerësimit të ofertave.
Në këto dokumente thuhet se janë shpallur fitues dashkimi i operatoreve “CSI Piemonte”, me seli në Corso, Torino, Itali; Datech sh.p.k me seli në Rr. Myslym Shyri, Tiranë dhe… Çelësi sh.p.k, me seli në rrugën e Kavajës, Tiranë.
Këto tre kompani kanë pranuar të bëjnë identifikimin e abonentëve të OSHEE-së me një fond prej 856.000.000 lekë të reja, afër 7 milionë USD, me afat realizimi kontrate 6 muaj, nga data e lidhjes së kontratës.
Ndërkohë, në këto dokumente që disponon Boldnews.al thuhet se shoqëria “Fastech” sh.p.k me nipt J 81609010 U nuk ka paraqitur ofertë ekonomike, çka ka sjellë dyshime se tenderi ka qenë i paracaktuar.
Pak javë më parë, Boldnews.al publikoi dokumentet e këtij megatenderi që ka bërë OSHEE, i cili bën fjalë për identifikimin e abonentëve të këtij operatori derë më derë. Sipas këtyre dokumenteve, OSHEE ka kërkuar nga operatorët privatë që të garojnë për të identifikuar abonentët. Megjithëse OSHEE ka të gjitha kapacitetet njerëzore për të identifikuar vetë abonentët, ajo ka vendosur që ta japë me “koncesion” edhe këtë shërbim, i cili duhet të jetë “A-ja” e punës së këtij Operatori.
OSHEE hapi objektin e prokurimit që bën fjalë për “identifikimin dhe popullimi i adresës për çdo shtetas në terren (derë më derë) si dhe përditësimi i të dhënave të konsumatorëve të OSHEE sh.a”.
Mësohet se fondi për këtë tender është plot 7 milionë USD, ndërsa burimi i financimit janë të ardhurat e OSHEE-së dhe të buxhetit të shtetit. Qëllimi i projektit është ndërthurja e përditësimit të të dhënave të RKGJC, RKA me përditësimi i të dhënave të Konsumatorëve të OSHEE-së.
