Merr fund maratona gjyqësore për Shpëtim Gjikën dhe të pandehurit e tjerë që u akuzuan për ndërtime të paligjshme me dokumente false në Vlorë. Dy pallatet me shumë kate do të kalojnë në pronësi të shtetit ndërsa Gjika, ndërtuesi, pronari i tokës dhe ish-punonjësja e bashkisë u dënuar me burgim të konvertuar në shërbim prove. Pra, edhe pse masakra urbane në Vlorë është e gjithëpranuar, ish-kryetari për 12 vite i këtij qyteti nuk do të bëjë asnjë ditë burgim.
I vetmi dëm që i ka shkaktuar gjykata Shpëtim Gjikës është se për 3 vite nuk do mundet të marrë poste shtetërore.
Në vendin e Gjykatës së Shkallës së Parë Vlorë, Gjika u gjet fajtor për veprën penale “falsifikim të dokumenteve” (4 vite burgim). Po kështu u gjet fajtor edhe për “veprime që pengojnë zbulimin e të vërtetës (1 vit) burg.
Ndërsa doli i pafajshëm për “shpërdorim detyre” “ndërtim të paligjshëm”. Edhe pse u gjet fajtor për dy vepra penale të dënueshme sipas kodit penale me 5 vite burg, Shpëtim Gjika nuk do të kryejë asnjë ditë burg pasi në pikën 6 të vendimit të gjykatës thuhet: “Në aplikim të nenit 59 të Kodit Penal, urdhërohet pezullimi i dënimit dhe vënia në shërbim prove për dy vite”, shkruan “Opinion.al”.
Po kështu gjykata vendosi sot të shpallë fajtor edhe ndërtuesin Artur Harxhi për vepren penale “falsifikim të dokumenteve”. Sakaq gjykata e shpall të pafajshëm Harxhin për vepren penale ndërtim pa leje. Ashtu si për Gjikën edhe për Harxhin, gjykata vendosi ti konvertohet dënimi në “shërbim prove”.
Ndërsa ish-punonjësja e bashkisë Vlorë, Dorina Sulaj u shpall e pafajshme për të gjitha akuzat që kishte ngritur prokuroria ndaj saj.
Ndërsa për Ridvan Mersinaj (pronari i tokës), i gjetur fajtor për falsifikim dokumentesh, gjykata dha gjithashtu dënimin me burg që konvertohet në shërbim prove.
Sakaq gjykata vendosi që të kalojnë në pronësi të shtetit dy objektet (11 kate secili) të cilat u ndërtuan mbi bazën e dokumenteve të falsifikuara.
Njëri prej objekteve të ndërtuara nga Harxhi dhe që me vendim gjykate do ti kalojë shtetit është në qendër të qytetit të Vlorës, shumë pranë Sheshit të Flamurit (Shih foton).
Prokurori Alber Kulici kishte kërkuar 9 vite burg për Shpëtim Gjikën, ndërsa trupi gjykues i përbërë nga
Mirela Mishgjoni, gjyqtare, Arbana Selmanaj, gjyqtare, dhe Laurent Fucia, gjyqtare-relatore vendosën ta lënë të lirë ish-kryebashkiakun dhe bashkëpunëtorët e tij që ngritën dy pallate me dokumente false në mes të Vlorës, raporton “Opinion.al”.
Kryetari i Bashkisë së Vlorës ishte arrestuar në 2015 kohë kur pësoi edhe një parainfarkt dhe më pas gjykata caktoi masën e sigurisë “detyrim paraqitje”.
Gjykata tashmë foli, autorët e veprave penale u dënuan por do ta vuajnë dënimin në liri. Sakaq shohim se gjykata në nxitim e sipër të dhënies së këtij vendimi nuk ka pasur mundësi as të bëjë tekstin me “ë”.
/R.D-Opinion.al
