Ashtu siç ishte folur më herët në media, përpos shtëpive që do shemben për ti hapur rrugë ndërtimit të Unazës së Madhe rrezikojnë të shemben edhe 200 banesa të tjera për rehabilimin e lumit të Lanës. Bëhet fjalë për banesat që janë në anën e djathtë të segmentit rrugor nga Pallati me Shigjeta deri tek Sheshi Shqiponja.
Partia Demokratike ka zbuluar sot se me shembjen e këtyre banesave nuk i hapet rrugë vetëm sistemit të Lanës, por ndërtimit të një blloku të madh pallatesh. PD ka publikuar dokumente se këto pallate do ti ndërtojë Edmond Bego, i dënuar për trafik droge.
Deputetja demokrate, Jorida Tabaku deklaroi se: “Edmond Bego ka parashikuar të ndërtojë një kompleks rezidencial luksoz tek zona e Unazës së Madhe. Për llogari të tij, Edi Rama dhe Erion Veliaj:
• kanë ndryshuar Planin Urbanistik të Tiranës
• kanë ndryshuar rrjedhën e lumit Lanë në favor të projektit luksoz të trafikantit të drogës
• kanë planifikuar dëbimin nga shtëpitë të të paktën 200 familjeve për pronën e Edmond Begos
Me Planin Urbanistik të vitit 2013 projekti për sistemimin e Lanës prekte një pjesë të tokës ku do të ndërtojë Mond Bego.
Bëhet fjalë për zonën e njohur si ish-Serat, e privatizuar në vitin 2016 me firmën të Arben Ahmetajt.
Plani Urbanistik u ndryshua në vitin 2017 me firmën e Edi Ramës dhe Erion Veliajt.
Plani Rama-Veliaj ndryshoi projektin për sistemimin e Lanës me qëllim mosprekjen e zonës së ish serave, ku trafikanti ndërkombëtar i drogës Edmond Bego, ka planifikuar të ndërtojë kompleksin luksoz rezidencial.
Ndërsa eksperti ligjor i PD-së, Gazmend Bardhi dha të tjera iformacione. Sipas Bardhit, me firmën e Arben Ahmetajt për privatizimin e ish Serave, mikut trafikant droge të Taulant Ballës, Edmond Bego, iu hap rruga qëtë ndërtojë në një sipërfaqe prej rreth 30 mijë metra katror.
“Dokumentet e Hipotekës provojnë se kjo sipërfaqe toke i ka kaluar për ndërtim kompanisë ALSION-ALBANIA, e cila është në pronësi 100 për qind e Mond Begës.
ALSION-ALBANIA do të ndërtojë tek ish Serat një projekt me vlerë fillestare investimi 60 milionë euro.
Të dhënat e projektit të siguruar nga Partia Demokratike tregojnë se vendndodhja e tij është përgjatë Unazës së Madhe, buzë lumit Lanë.
Projekti luksoz i Mond Begës është krijuar nga studio italiane MISALAB, ku si klient paraqitet kompania tjetër e Mond Begës, INERTE EXPRES.
Kompleksi rezidencial, ku do të investohen 60 milionë euro, është paraqitur prej Edmond Begos në Bashkinë e Tiranës, ku kanë nisur procedurat e pajisjes së tij me leje ndërtimi.
Edi Rama dhe Erion Veliaj kanë ndryshuar Planin Urbanistik për ta vënë në funksion të realizimit të projektit të Edmond Begës.
Nga ndryshimi i projektit preken rreth 200 familje,ku pjesa dërrmuese e tyre janë në proces legalizimi. Kjo do të thotë që Edi Rama do të nxjerrë në qiell të hapur mijëra banorë për t’i shërbyer pastrimit të parave të pista që vijnë nga krimi i organizuar dhe trafiku ndërkombëtar i drogës”, tha Bardhi.
Dokumenetet që vertetojne devijimin e Lanes dhe projekti i kompanise per pallate
