“Hedh dyshime të arsyeshme për ICTS. ICTS është një kompani qipriote. Por këtu vetëm emrin e ka qipriot. Përqindjet më të mëdha i ka Riformato, pra personi që ka mbrojtur Riformaton ka aksionet më të mëdha”, u shpreh Shemsi Prençi të mërkurën në Opinion.
Bëhet fjalë për kompaninë koncesionare ICTS, e cila është përgjegjëse për sigurinë brenda aeroportit. Sipas ekstraktit të kompanisë në QKB, rezulton se një nga aksionerët më të mëdhenj me 30 për qind, është avokati i Partisë Socialiste, Eno Bushi.
Ky i fundit njihet edhe si avokati i pilotit italian Giorgio Riformato, i cili në vitin 2015 u rrëzua me avionin e tij në Divjakë.
Aeroporti “Nënë Tereza” ka kontratuar për këtë çështje ICTS Albania një kompani e krijuar në vitin 2005, që ka angazhuar 152 punonjës dhe që qarkullon në vit rreth 309 milionë lekë. Vetëm në vitin 2017 sipas bilanceve i janë arkëtuar 2.5 milionë euro me qëllim garantimin e sigurisë në aeroport.
Krahasuar me një vit më parë të ardhurat e saj janë rritur me rreth 20%, ndërsa në raport me vitin 2014 me 30%. ICTS Albania para taksave kishte një normë fitimi prej 12% ose rreth 37.7 milionë lekë në vit.
Megjithëse nga viti në vit të ardhurat e kompanisë përgjegjëse për sigurinë kanë njohur rritje ajo për të dytën herë dështoi të ndalojë vjedhjen brenda aeroportit. Grabitja e 9 prillit në hangarin e avionit erdhi tre vite pas asaj të 30 qershorit të 2016-ës kur një makinë e blinduar ra pre e grabitësve ndërsa transportonte paratë drejt avionit.
Ndërkohë vetë shoqëria që menaxhon konçesionin e aeroportit të Rinasit tetorin e vitit 2016 ndryshoi pronësi, sipas ABC News. China Everbright Limited, një kompani ndërkombëtare investimesh dhe menaxhimi të aseteve e vendosur në Hong Kong sipas njoftimit zyrtar të Aeroportit Ndërkombëtar e mori në 100% në zotërim.
Por zyrtarisht në Qendrën Kombëtare të Biznesit aksionieri i vetëm i tij në vend që prej prej 11 nëntorit 2016 është Real Fortress Private Limited. Një kompani e krijuar në 22 qershor 2016 me adresë në Singapor dhe që rregullohet nga ligjet e këtij shteti. Një kompani offshore, e cila tashmë menaxhon koncesionin e aeroportit të vetëm ndërkombëtar në vend./Opinion.al
