Mjeku sirian flet për Sky News pasi ka punuar për më shumë se 18 orë duke operuar kryesisht fëmijët e lënduar. Ai thotë se si pasojë e tërmetit ka mungesë të stafit, medikamenteve dhe energjisë elektrike.
Ai e përshkruan spitalin si “një zonë lufte”.
Dr Osama Sallom, i Shoqatës Mjekësore Siriane Amerikane (SAMS), po punon në spitalin Bab Al Hawa, i cili ka marrë mbi 400 viktima dhe ka raportuar mbi 50 vdekje.
“Shumica e pacientëve janë fëmijë që rrjedhin gjak dhe vdesin nga i ftohti pasi kanë ngecur nën rrënoja”, tha Dr Sallom.
“Ne po kërkojmë nën rrënoja, por është shumë ftohtë. Do të jetë -1 ose -2C për ekipet e shpëtimit që punojnë gjatë natës. Po pranojmë gjithnjë e më shumë pacientë çdo orë dhe spitali ynë është i stërmbushur me pacientë që mbushin korridoret”., thotë ai.
Dr Sallom tha se ka një “mungesë të madhe të personelit dhe pajisjeve” në spital dhe të gjitha repartet ishin të zëna nga pacientë, kryesisht gra dhe fëmijë.
“Të gjithë shtretërit tanë janë plot, njerëzit duhet të shtrihen në tokë. Pas disa orësh nuk do të ketë më hapësirë në tokë. Kjo të kujton një zonë lufte, po u jep shumë njerëzve kujtime traumatike. Çdo moment dëgjoj të vijnë ambulancat me më shumë viktima. Mundësia për të shpëtuar njerëzit zvogëlohet çdo orë.”, tha ai.
Dr Sallom tha se kufiri ishte plotësisht i mbyllur dhe pacientët nuk mund të referoheshin në Turqi, gjë që ka ngarkuar shumë spitalin ku ai po punon.
Ai thotë se duhet të merren me lëndime të komplikuara vetë.
“Ne kemi vetëm një skaner CT dhe nuk kemi pajisje të specializuara. Ka një nevojë të madhe për skanimin CT, por [pacientët] duhet të presin tre ose katër orë për një skanoni,” tha doktori sirian.
Ai foli gjithashtu për pasgoditjet e vazhdueshme që vinin “çdo pesë minuta” dhe ishin “shumë të forta”.
Duke shtuar se “Është katastrofike dhe ne vetë kemi frikë. Miku im, menaxheri i spitalit, humbi familjen e tij ndërsa gruaja dhe fëmija im janë në Turqi. Jam shumë i trishtuar”, tregon doktori.
Situata i kujtoi Dr Sallomit bombardimet e Alepos në vitin 2016, të cilat shkatërruan spitale, shtëpi dhe vranë qindra civilë.
“Jam shumë i trishtuar, ky incident është më i keq për sirianët sepse ne kemi jetuar shumë vite si një vend i shkatërruar nga lufta. Tani kemi të njëjtën ndjenjë. Ne po humbasim shpresën për të shpëtuar fëmijët për shkak të një nevoje të madhe për materiale harxhuese dhe ilaçe të cilat do të mbarojnë në orët e ardhshme.”, përfundon ai.
