Në gjendje të rënduar psikologjike, Bledar Trëndafili, u shpreh i penduar para gjykatës për aktin e rëndë që kreu një muaj më parë kur dogji me benzinë ish-bashkëshorten.
Gjatë seancës autori është shprehur i penduar ku ka deklaruar se nuk donte ta bënte atë veprim.
Ai ka thënë se ish-bashkëshortja nuk e lejonte të takonte fëmijët, ku ka hedhur akuza edhe për tradhëti.
Kujtojmë se ngjarja e rëndë ndodhi kur 45-vjeçari i kërkoi Melisa Trëndafilit që të dilte nga banesa që kishte marrë me qira. Në momentin që flisnin me njëri-tjetrin, pak metra larg shtëpisë, Bledar Trëndafili i hodhi benzinë 31-vjeçares dhe i vuri flakën.
Ajo përfundoi në spital me djegie të rënda kryesisht në pjesën e fytyrës dhe qafës ndërsa pas trajtimit në QSUT mjekët thanë se gruaja është jashtë rrezikut për jetën.
Çifti prej 4 muajsh jetonin të ndarë ndërsa nga gjykata e Korçës thonë zyrtarisht se nuk ka patur kërkesë për zgjidhje martese. Ata janë prindër të dy fëmijëve të mitur.
