Policia e Vlorës ka zbardhur ngjarjen e një dite më parë ku u dogjën tre makina në lagjen ‘Pavarësia’ në Vlorë.
Uniformat blu bëjnë me dije se kanë vënë në pranga porositësin e vënies së zjarrit Julian Çobo 32 vjeç, si dhe ekzekutori Kreshnik Yzeiri, 40-vjeç. Në kërkim është shpallur Elton Lushaj, 41 vjeç, banues në Vlorë.
Sipas reporttv, Elton Lushaj ka siguruar lëndën djegëse, ndërsa Kreshnik Yzeiri ka kryer zjarrvënien. Policia thotë se nga hetimet, rezulton se Julian Çobo ka bashkëpunuar me 2 të tjerë, për djegien e 3 automjeteve, për motive të cilat policia nuk i bën të ditura duke qenë se hetimi vijon.
Bëhet e ditur se Kreshnik Yzeiri, është nisur nga zona e stacionit të trenit në lagjen 24 Maji në Vlorë, është ndalur në një karburant ku ka pirë kafe, teksa më pas bidonin e ujit gjysmë litri e ka mbushur me benzinë për ta përdorur për t’i vendosur zjarrin automjeteve.
Të gjitha këto lëvizje janë vëzhguar pas ngjarjes nga policia e Vlorës, teksa janë regjistruar si prova materiale tashmë. Personi në fjalë dyshohet të ketë qenë i veshur me bluzën e zezë dhe kapale në kokë Sa është afruar pranë makinave është maskuar për të humbur gjurmët.
