Prokuroria e Tiranës ka mbyllur hetimet për vrasjen e Menduh Kurtdedës, ngjarje e ndodhur në vitin 2017. Menduh Kurtdeda u dogj i gjallë në Dajt për një borxh 1 milionë lekë.
Prokuroria ka ngritur akuzat për “Vrasje me dashje” për tre persona, Gazmir Ngota, Besmir Karaj dhe Marjeta Karaj.
Besmiri, i biri i Marjeta Karaj, ekzekutoi së bashku me shokun e tij Gazmir Ngota, Mehdu Kurtdedën, me kërkesë të nënës së tij.
Dy shokët morën të ndjerin në makinë dhe e transportuan në Kodër Shupal. Aty e lidhën dhe i ushtruan presion për kthimin e borxhit që e pandehura M.K., pretendonte se i ndjeri i kishte. Në momentin që viktima ka mohuar borxhin dy personat i kanë vënë flakën.
“Më 16.05.2017 në vendin e quajtur Kodër Shupal, Zall-Bastar Tiranë u gjet një kufomë e seksit mashkull, i cili pas aktit të ekspertimit, u identifikua si shtetasi M.K.
Nga hetimet e prokurorisë, rezultoi se shtetasja M. K., e punësuar si sekretare në një OJF ka pasur mosmarrëveshje të vazhdueshme me të ndjerin, në lidhje me financimin dhe menaxhimin e fondeve të shoqatës.
Në 2017 djali i saj, shtetasi B.K. dhe miku i tij, i pandehuri G.N., me kërkesë të shtetases M.K., kanë marrë të ndjerin në makinë dhe e kanë transportuar në Kodër Shupal. Aty e kanë lidhur dhe ushtruan presion për kthimin e një borxhi që e pandehura M.K., pretendonte se i ndjeri i kishte. Në momentin që viktima ka mohuar borxhin dy personat i kanë vënë flakën.
Shtetasi G.N., shfaqi pendesë dhe pranoi të bashkëpunojë me drejtësinë duke rrëfyer ngjarjen.
Nga rrethanat dhe provat e administruara, gjatë fazës së hetimit paraprak rezultoi plotësisht e provuar se të pandehurit kanë konsumuar elementet e veprës penale “Vrasje me dashje” e kryer në bashkëpunim e parashikuar dhe e dënueshme nga neni 76-25”, njofton prokuroria.
