Një bandë shqiptaro-tuniziane e dedikuar për trafikun e drogës është shkatërruar në Itali. Si rrjedhojë e operacionit të koduar “ Bavaria 2021” mediat italiane bëjnë me dije se u arrestuan 4 shtetas shqiptarë dhe 1 tunizian. Grupi në fjalë kishte ndërtuar një rafineri të përpunimit, paketimit të drogës dhe shpërndarjes së saj në treg. Mes drogave që ky rrjet përpunonte ishte dhe 6-Mam, e njohur ndryshe si “heroina vrasëse”.
Kjo drogë përmban 6 monoacetilmorfinë, që është një substancë që rrjedh nga morfina dhe shumë e ngjashme me heroinën, por me efekte më të shpejta dhe më të rënda pasi përftohet duke shtuar një sasi të tepërt të acidit klorhidrik, që ka rrezik për shëndetin.
Mediat lokale italiane bëjnë me dije se grupi përdorte të ashtuquajturat telefona “intercom” për të shkëmbyer mesazhe midis furnizuesit dhe klientit dhe për të mos tërhequr vëmendjen përdornin makina të vogla.
Ajo që vihet re është gjuha që përdorej për shkëmbimet e drogës: “Nesër s’kam angazhime do të vija me mishin ta piqja në skarë” ?; ose, për të diskutuar sasinë: “A marr më shumë kosto? Apo ato të zakonshmet?”
Bëhet me dije se të arrestuarit janë të moshave 31-41 vjeç dhe aktualisht ndodhen në burgun Montorio Veronese. Një nga shqiptarët u kap nga autoritetet italiane sapo zbriti nga aeroporti i Veronës, pasi kishte udhëtuar nga Rinasi.
Media italiane shkruan se që nga fillimi i vitit 2022, karabinierët e Veronës kanë arrestuar 13 persona dhe kanë sekuestruarmbi 42 kilogramë drogë. Ky operacion i mëtejshëm tregon vëmendjen dhe angazhimin e vazhdueshëm të Guardia di Finanza për të luftuar trafikimin dhe shitjen e drogës.
