Kreu i Bashkisë së Tiranës, Erion Veliaj në mbledhjen e sotme në Komisionin e Ligjeve, ngriti disa shqetësime që lidhen me transportin publik.
Veliaj tha se industria e transportit publik është në prag të kolapsit, ndërsa bashkia do të do të subvencionojë 1 milion dollarë për të shpëtuar këtë sektor, por theksoi se të gjitha palët duhet të mbajnë pjesën e ‘barrës’ që i takon.
“Kemi një paketë që të bëhet i menaxhueshëm. Industria e transportit publik që sot është në prag të kolapsit. Bashkia është përgatitur të bëjë subvencion 1 mln dollarë për të shpëtuar transportin publik, por duhet që secili të bëjë pjesën e vet të barrës”, tha Veliaj.
Më tej, kryebashkiaku i Tiranës theksoi se që të mos kemi një rritje të çmimit të biletës, propozon që të hiqet TVSH e biletës.
“Një nga problematikat që kemi, për të cilat kemi marrë edhe dakordësinë e qeverisë, është transporti publik. Sot jetojmë në një situatë ku tregu i naftës është ky që është dhe ne kërkojmë që ai vullneti i qeverisë të reflektohet dhe një dakordësi në parlament, kur vjen puna për të ndihmuar sidomos operatorët e transportit publik. Ne nuk duam kurrsesi të rrisim çmimin. Vetëm për nivelin e tregut dhe çmimit të naftës ne sot jemi të ç’balancuar. Një propozim që kemi bashkë me qeverinë është të heqim TVSH e biletës dhe automatikisht në vend të rrisim biletën me 20% e rikuperojmë me heqjen e TVSH. Po ashtu mund të bëhen veprime dhe kur vjen puna me doganën dhe TVSH e mjeteve të transportit publik, tjetër mund të jetë rimbursim i TVSh apo akcizës së naftës”, u shpreh ai.
