Zemërimi për vrasjen e adoleshentit Nahel nga policia ka prodhuar trazirat më të mëdha të viteve të fundit në Francë, me qeverinë e Emmanuel Macron që po has në vështirësi për të kontrolluar valën e dhunshme të protestave.
Edhe pse një ndër masat e marra mbrëmë për të trajtuar krizën ishte vendosja e 45,000 policëve në rrugë dhe nxjerrja e mjeteve të blinduara, turmat nuk u ndalën në natën e 4-të të trazirave.
Teksa Franca po përgatitet për një ditë të pestë të mundshme përplasjesh mes protestuesve dhe policisë, dëshmia e një prej miqve të 17-vjeçarit që ishte pasagjer në mjet i ka hedhur benzinë zjarrit.
Në audion që është shpërndarë gjerësisht në rrjet, miku i Nahel Merzouk tregon se agjentët kërcënuan me vdekje 17-vjeçarin përpara se ta qëllonin.
Sipas tij një prej oficerëve pak çaste para se i riu të qëllohej për vdekje, iu drejtua me fjalët: “Mos lëviz se do të fus një plumb kokës”.
Pasagjeri, i cili ishte me Nahelin në makinë thotë se po ndan versionin e tij të historisë për të nxjerrë në pah të vërtetën.
“Ka shumë gënjeshtra në rrjetet sociale dhe do të tregoj historinë nga A në Z“, është shprehur ai.
Pasagjeri, i cili ndodhej në makinën me targa polake tha se ata e morën makinën hua dhe po ecnin rreth Nanterre, por nuk ishin nën ndikimin e alkoolit apo drogës.
Ai tha se ata ishin në një korsi autobusi kur vunë re policët me motoçikleta që i vinin pas, duke i ndaluar. Ai tha se një oficer erdhi në dritare dhe i tha Nahelit: “Fike makinën ose do të të qëlloj”.
Ai pretendon se oficeri po ashtu e ka goditur Nahelin me qytën e armës. Sipas tij oficeri i dytë tha: “Gjuaj”, para se i pari ta godiste përsëri me qytën e armës.
Oficeri i dytë, tregon ai, qëlloi më pas ndërsa Naheli vendosi këmbën në gaz.
“E pashë me dhimbje, u drodh. Ne goditëm një barrierë. Kisha frikë. Dola nga automjeti dhe ika. Mendova se mund të më qëllonin ndaj vrapova. Jam i tronditur nga ajo që i ndodhi para meje shokut tim”, përfundoi ai.
Rrëfimi i të riut vjen në ditën kur në Nanterre u zhvillua funerali i Nahelit.
Ceremonia mortore nisi mëngjesin e sotëm, me familjarë e miq të adoleshentit që shoqëruan arkivolin për në një xhami dhe më pas në varrezat e qytezës në periferi të Parisit.
Rrugët që të çonin në sallonin e funeralit dhe varreza u mbyllën nga forca të shumta policie.
Vdekja e Nahelit, e kapur në video, ka ringjallur ankesat e gjata nga komunitetet e varfra dhe të përziera racore për dhunën policore dhe racizmin në Francë, teksa Presidenti Macron ka mohuar kategorikisht se ka racizëm sistemik brenda agjencive franceze të zbatimit të ligjit.
