Ministria e Shëndetësisë njoftoi se në 24 orët të fundit janë testuar 238 qytetarë të dyshuar si të prekur me Covid-19, nga të cilët kanë rezultuar pozitivë 8 qytetarë.
Po ashtu, në përditësimin e të dhënave u njoftua se gjatë këtij muaji është trefishuar numri i testimeve dhe aktualisht ka një indikator pozitiviteti nën 5 %, që konsiderohet një indikacion shumë i mirë lidhur me kontrollin e virusit.
Lidhur me testimet serologjike, Ministria sqaron se në Laboratorin e Mikrobiologjisë në QSUT, po vazhdon proçesi për grupet më të riskuara.
Ministria e Shëndetësisë ka bërë të ditur se deri tani janë testuar 440 persona, staf mjekësor, nga të cilët kanë rezultuar pozitivë 11.2 përqind e të testuarve, por nuk është sqaruar nëse këta persona janë aktualisht pozitivë apo e kanë kaluar Covid-19.
Ministria sqaron se këto janë rezultate paraprake dhe në ditët në vazhdim pritet të merret një kampion më i madh, kështu që ato mund të ndryshojnë.
Në një fazë të dytë, sipas mjekes Eugena Tomini nga Instituti i Shëndetit Publik do të zgjerohet testimi në popullatë për të parë % e saj që e ka kaluar sëmundjen./Opinion.al
