Një atentat që do të kryhej ndaj një shtetasi nga një grup kriminal në qytetin e Beratit është parandaluar nga Policia e Shtetit.
Policia ka shpallur në kërkim 3 persona, pjesëtarë të grupit që do të kryente atentatin dhe vijon puna për identifikimin e shtetasve të tjerë të përfshirë në këtë rast. Bëhet fjalë për H. B., 55 vjeç, banues në Kosovë, A. Sh., 30 vjeç, banues në Korçë dhe E. G., 43 vjeç, banues në Tiranë.
Mësohet se efektivët e policisë, pasi kanë siguruar informacion se disa shtetas do të kryenin një vrasje në qarkun e Beratit, kanë organizuar punën, me qëllim parandalimin e atentatit, si dhe për kapjen e shtetasve që do ta kryenin atë.
Pika kontrolli me shërbime grackë të policisë u ngritën në disa rrugë dhe fshatra ku dyshohej se mund të kryhej kjo ngjarje kriminale. Të ndodhur në këtë situatë personat që kishin planifikuar këtë atentat, në pamundësi për të realizuar qëllimin e tyre, të gjendur nën presionin e Policisë, kanë fshehur automjetin brenda të cilit kishin mjetet për kryerjen e krimit, dhe duke përfituar nga errësira, janë larguar në zona të pyllëzuara.
Efektivët e Policisë, si rezultat i kontrolleve të imtësishme dhe informacioneve policore të siguruara, kanë bërë të mundur gjetjen e automjetit, të një motomjeti të vjedhur, me 2 skafandra, të veshjeve të kamuflazhit (xhup meshini), të një arme zjarri automatik me silenciator, të një pistolete me silenciator dhe të një sasie municioni luftarak.
Në vijim, nga kontrolli në banesën e njërit prej shtetasve të shpallur në kërkim, konkretisht në banesën e shtetasit E. G., u gjetën dhe u sekuestruan në cilësinë e provës materiale, 2 radio marrëse-dhënëse, dylbi, dorashka dhe lëndë djegëse.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprat penale “Sigurimi i kushteve dhe mjeteve për të kryer vrasje” dhe “Prodhimi dhe mbajtja pa leje e armëve, armëve shpërthyese dhe municionit luftarak”.
