Kreu i Partisë Demokratike, Lulzim Basha, ka theksuar dhe njëherë se nuk do të ketë asnjë marrëveshje me kryeministrin Edi Rama dhe se largimi i tij është i panegociueshëm.
Basha tha se Rama do të ketë një fund të keq politik, pasi është një kryeministër i lidhur me krimin dhe nuk i shërben interesave të qytetarëve.
“Nuk bëjmë marrëveshje me Ramën në asnjë rrethanë dhe asnjë kusht. Nuk diskutojmë me të në asnjë rrethanë. Tashmë ikja e tij është e vetmja rrugë për të zgjidhur krizën. Ata që mendojnë se Rama do ia hedhë gabohen, ai është në fund të rrugës së tij politike dhe do jetë fund i keq. Ai ka shkelur çdo ligj, ka shkelur çdo standard, vlerë, rregull e normë sadopak demokratike. Ka prekur nivelin që rrallë e arrijnë edhe liderët lindorë. Gjithçka e ka bërë vetë për pushtet dhe para, por paratë nuk do ta mbrojnë më. Natyrisht, ai ka akoma mbështetës naivë, që mbyllin sytë para bashkëpunimit të tij me krimin. Do ketë të tillë edhe ditën që Edi Rama do të rrëzohet, siç ka sot ende njerëz që duan Enverin. Por ata nuk e mbajnë dot në pushtet Ramën. Ai do të largohet, sepse nuk përfaqëson më interesin e shqiptarëve, por vetëm të një grushti biznesmenësh e kriminelësh. Ata që mendojnë se populli do mbajë një kriminel si Rama, gabohen. Ikja e Ramës është në interes të integrimit. Me Ramën në krye, Evropa do ketë vetëm krim e drogë,-tha Basha./ Opinion.al E.Xh.
