Kryeministri Edi Rama deklaroi se nuk ka marrë ende një vendim për të kandiduar si deputet për Tiranën dhe theksoi se me shumë gjasa “nuk do të jetë fare në listë”.
Këtë deklaratë kreu i qeverisë e bëri para grupit parlamentar të PS, ku foli gjatë për zgjedhjet e 11 Majit.
Rama tha se prezenca e tij në listat e deputetëve do të ishte hyrje në hak ndaj të tjerëve, duke sqaruar se për aq kohë sa ka detyrën e kryeministrit nuk ka pse të jetë deputet.
“Asnjë drejtues politik nuk besoj kurrë që mund të futet në preferenca se për kë duhet të votojnë anëtarët e PD. Kjo është e padiskutueshme. Natyrisht e njëjta gjë vlen edhe për rastin tim. Nuk e kam pasur dhe as e kam idenë pse unë duhet të jem deputet në atë parlament përsakohë kam këtë detyre.
Do të ishte prapë një hyrje në hak ndaj të tjerëve që të vendosej emri im dhe pastaj të vinin votat dhe të çorientoheshin njerëzit. Kështu që kush është në lista të hapura duhet të jetë në një garë shumë të barabartë. Ndërkohë që vendimin për veten time nuk e kam akoma të marrë plotësisht se mund të mos jem fare në listë, duke qenë deputet i të gjithëve për detyrën që kam dhe për të mos i zënë vendin askujt.
Nëse ka një gjë që na ka mbajtur gjithmonë në kalë është se kemi pasur kapacitetin të ndryshojmë pa parritur që të na hedhin njerëzit në kosh siç na hodhën në 2005, që pastaj ne të ndryshojmë.
Që nga 2009 deri më sot ne kemi vazhduar të ndryshojmë dhe kjo është ADN e PS. Për peshën e madhe që kanë këto zgjedhje unë mendoj dhe besoj se pavarësisht në skuadrën e deputetëve ose jo të gjitha ata që janë nën këtë çati i duhen mandatit tjetër të PS”, tha Rama.
